霍汶希否認張敬軒被除名

早前，張敬軒（軒仔）高調宣布出戰內地歌唱比賽節目《歌手》，並已參加首集節目錄影。不過，近日軒仔喺微博發表一篇提及敏感話題嘅文章，觸發內地網民嘅神經，令內地電視台處於兩難局面，最終決定一刀切。有傳軒仔錄影嘅唱歌部分，連同其他歌手嘅互動全部都會被「消失」。日前， 軒仔被拍到現身中環某食品店入貨，佢一臉愁容，似係受近日嘅負面新聞影響。

張敬軒因一篇涉及敏感話題嘅文章，觸發內地網民嘅神經。

有傳軒仔除咗被踢出《歌手》，更慘遭唱片公司英皇娛樂「暗中除名」。早前，英皇娛樂旗下一班歌手齊齊為謝霆鋒主演嘅新戲《決戰食神》合唱主題曲，惟獨軒仔冇份。而「英皇超級巨星演唱會」最近先後喺上海、北京及廣州舉行，三場演出亦未見軒仔蹤影。對此，英皇娛樂高層霍汶希否認話：「冇咁嘅事，軒仔一直係英皇重點歌手，公司正為佢籌備緊演唱會同新碟。」

霍汶希話張敬軒係公司重點歌手，否認將佢「暗中除名」。