新奸角笑到你驚

人氣英劇《新福爾摩斯》第四季噚日終於首播，新故事講到男主角班尼狄甘巴貝治扮演嘅福爾摩斯，因為宿敵Moriarty回歸，所以獲豁免殺人罪，重回倫敦查案，以防發生恐怖襲擊。福爾摩斯嘅好拍檔華生就升呢做爸爸，而福爾摩斯更幫華生湊BB，爆出唔少笑料。其後，華生老婆Mary為咗幫福爾摩斯擋子彈中槍身亡，搞到華生同福爾摩斯決裂。

福爾摩斯似乎被逼入絕路，精神頻臨崩潰。

至於《新福爾摩斯》第四季出現嘅新奸角，就係由Toby Jones扮演嘅Culverton Smith。而福爾摩斯就經常以殘到爆嘅樣示人，似乎被奸角逼得好緊。喺第二集預告片中，福爾摩斯就好激動咁講：「佢係我見過之中最危險、最卑鄙嘅人，一定要了結呢個怪物。」至於喺片尾就見到Culverton Smith嘅恐怖笑容，似乎佢比Moriarty更難對付。

Culverton Smith呢個恐怖笑容，絕對令人心寒。