高調行街放閃

日前，天王郭富城（城城）同老婆方媛婚後首度公開放閃，兩人以夫妻Look現身商場，一直盛傳懷孕嘅方媛好似小鳥依人咁，全程甜笑繞實老公，城城則Man爆放慢腳步護妻。兩人行咗大約兩個鐘頭，總共掃咗三大袋戰利品，行到去商場門口，有男粉絲上前要求合照，城城都大方答應。問到同老婆買咗咩戰利品？城城話：「同老婆一齊揀禮物畀媽媽。」

郭富城同方媛婚後高調放閃，兩人手拖手現身商場。

近日，方媛親自落廚炮製三餸一湯，並以報紙當枱布，被網民稱讚貼地又慳家。問城城喺母親節當日方媛有冇落廚煮兩味？佢話：「無喇，之前先同老婆撑完枱腳，我哋出去食飯，唔想煮，媽媽年紀大。」講到母親節難得放假，城城話多謝新戲劇組放人，待佢可以由內地返港，有時間同家人食飯。問城城係未好快「升呢」做爸爸？佢就依然封口：「未講得住。」

郭富城繼續封口避談方媛係咪懷孕嘅話題。